Alberto FM: «É que ninguén vai pensar nos estudantes?»

---

Este artigo é unha colaboración de Alberto FM. Se tu tamén queres colaborar con As MIR e unha noites, ponte en contacto pola páxina do Facebook ou o correo-e contacto@asmireunhanoites.com.

---

Se hai un par de semanas o proxecto dun novo edificio para a Facultade de Medicina volvía saltar ós medios de comunicación, unha vez mais chégannos novas que en realidade non son tan novas.

Desta vez o que se vende é un “pacto histórico entre as tres universidades galegas” para a colaboración na docencia clínica do grao en medicina.

E por que esta nova non é tan nova? Pois porque este é xa o terceiro acordo do mesmo tipo asinado polas mesmas partes nos últimos 7 anos (2008, 2010 e 2015). Aínda que se cadra esta vez contou con algo máis de pompa e presencia política, case como se se tratase dunha inauguración ás portas das eleccións...

Foto dos antigos acordos ao mesmo respecto.

Como xa denunciamos os estudantes nas dúas anteriores edicións deste festival de sinaturas, a calidade da docencia é a suposta motivación para estas negociacións pero sempre queda esquecida. Isto é así porque estes acordos só tentan delimitar as competencias docentes e administrativas das universidades, acoutando a rifa histórica polo reparto do pastel que supón ter unha facultade de Medicina, e dar cabida xurídica ós docentes para que non estean en terra de ninguén e poidan ver recoñecido o seu fundamental labor. Ata aquí todo ben, todo moi importante e necesario, podería dicirse que son os cimentos para descentralizar a docencia clínica. Pero polo que se ve nunca chegan a materializarse...

Ademais, a principal eiva de todas as versión de acordo é que a docencia clínica leva xa anos impartíndose fóra de Santiago, supoñendo incluso dende o curso 2009-2010 unha significativa alteración na planificación docente co coñecido como “plan mensual”, o sistema menos malo dos posibles e que tantas dores de cabeza nos costou acadar ós estudantes. Entón, como se está a organizar ata agora a docencia clínica descentralizada de Medicina? Moi sinxelo: en precario, con parches organizativos case sobre a marcha curso a curso.

De feito, segundo a miña experiencia, se a valoración da docencia clínica fóra de Santiago é polo xeral mellor que no CHUS non se debe en absoluto ós grandes pactos entre as universidades e a Xunta de Galicia. A mellor calidade das prácticas descentralizadas débese única e exclusivamente ao labor dos estudantes que xeito altruísta exercen de “delegados de hospital” e á boa vontade e traballo dos profesionais dos centros receptores, xa que unha vez a Facultade de Medicina se libra de ti incluíndote na lista de descentralizados, nin a USC nin as demais universidades se preocupan o máis mínimo da túa existencia.

Pero é que ninguén vai pensar nos estudantes? Porque na típica frase de discurso “O fin último son os estudantes”, o de último non debería ser levado á práctica tan literalmente...